Baby Jeanty, yon adolesan 13 lane, pèdi lavi li anba bal yon ajan BSAP nan Fonmelon, Mabial, nan komin Jakmèl. Tragedi sa te rive pandan yon dans ki t ap fèt nan zòn nan. Mèt dans lan te angaje kèk ajan BSAP pou asire sekirite pandan aktivite a.
Manman Baby se fanmi mèt dans lan, e li te konseye pitit li pou pa ale nan denye jou dans lan, paske li te gen pou ale lekòl nan denmen. Men, Baby te deside malgre tout bagay, ale nan dans lan san manman li pa t konnen. Lè li te rive, li remake manman li tou pre, e li kouri al kache dèyè yon touf vetivè pou evite wè l.
Se pandan li t ap kache a, ajan BSAP la santi prezans yon moun bò touf vetivè a. Li mande “Kiyès sa?” Men Baby pa reponn, e ajan an tire alèz bò touf la. Malerezman, bal la frape Baby Jeanty, epi li mouri sou plas.Pèsonn nan kominote a poko konnen non ajan BSAP ki komèt aksyon sa. Nouvo sa a leve anpil kòlè ak kesyon nan mitan moun Kap Wouj nan Fonmelon, kote Baby te rete. Yo revandike pou jistis pou lanmò sa ki te ka evite.
Ale an pè Baby Jeanty. Moun Kap Wouj pap janm bliye w. Tragedi sa raple nesesite pou amelyore relasyon ant fòs sekirite yo ak kominote yo, epi asire pwoteksyon tout sitwayen, espesyalman jèn yo. Moun Kap Wouj pa ka kite l’apot sa pase san reyaksyon ak apèl pou jistis.
#TiKozeakLynn